WATATU MBARONI KWA TUHUMA ZA KUKUTWA NA KARATASI ZA NOTI BANDIA

KAMANDA WA POLISI MKOA WA RUVUMA MIHAYO MSIKELA

Na Gideon Mwakanosya-Songea

JESHI la Polisi mkoani Ruvuma limewatia mbaroni watu watatu ambao  walikamatwa wakiwa na bunda kumi za karatasi zenye sura ya Dora mia moja ambapo kila bunda moja lina karatasi 86 zenye thamani ya shilingi milioni 86 za kitanzania .

Watuhumiwa waliokamatwa  wametajwa kuwa ni Bonifasi Simwanza(41) ambaye ni raia wa nchi ya Zambia, Adam Msongole(26)mkazi wa mji mdogo wa Tunduma uliopo wilayani Momba mkoa wa Mbeya uliopo mpakani mwa Tanzania na Zambia na Hatmani Steven(29) Mkazi wa eneo la Makumbusho kijitonyama jijini Dar es salaam.

Akizungumza na Nipashe jana ofisini kwake kamanda wa polisi wa mkoa wa Ruvuma Mihayo Msikhela alisema kuwa tukio hilo lilitokea April 19 mwaka huu majira ya saa 7 mchana huko katika eneo la Mtaa wa Oil Com Petrol station mjini kati  manispaa ya songea.

Alieleza zaidi kuwa siku hiyo ya tukio Afisa upelelezi wa makosa ya jinai wa mkoa wa Ruvuma Revocatus Malimi akiwa ameongozana na askari walifanikiwa kuwakamata watu watatu wakiwa na karatasi za kutengenezea noti bandi.

Alifafanua zaidi kuwa askari hao walikamata bunda kumi za karatasi zenye sura sawa na dola mia moja ambapo  kila bunda moja lina karatasi 86 na baadhi ya vitu vingine ambavyo alivitaja ni mkasi mmoja, Gloves mbili na pamoja na karatasi nyeusi ambazo zinadaiwa kuwa ni malighafi za kutengenezea dola.

Kamanda Msikhela alieleza kuwa jeshi la polisi mkoani humo linaendelea kufanya uchunguzi wa kina na baada ya kukamilisha uchunguzi huo watuhumiwa watafikishwa mahakamani kujibu tuhuma zinazowakabili.

MWISHO.