KIKONGWE CHA MIAKA 73 AUAWA NA MAJAMBAZI

Na Stephano Mango Namtumbo

Jeshi la polisi mkoa wa Ruvuma linawasaka watu watatu wasiofahamika wanaodaiwa kuwa ni majambazi ambao walivamia nyumba na kumpiga nondo kichwani Winfrid Asilia Sanga (73) mkazi wa kijiji cha msindo akiwa amelala na kumsababishia kifo kisha kupora fedha shilingi elfu 80,000 /=za kitanzania .

 

Habari zilizopatikana jana mjini hapa ambazo zimethibitishwa na kaimu kamanda wa polisi wa mkoa wa Ruvuma Revocatus Malimi zilisema kuwa tukio hilo lilitokea septemba 7 mwaka huu majira ya saa 6:30 usiku huko katika  kijiji cha msindo.

 

Alisema kuwa inadaiwa siku hiyo Sanga akiwa amelala nyumbani kwake alivamiwa na watu watatu wasiofahamika na walimpiga nondo kichwani kisha kopora fedha shilingi elfu 80000 ambazo alikuwa amezihifadhi chini ya godoro.

 

Alisema kuwa wakati anapigwa na majambazi hao sanga alipiga kelele ambazo zilisababisha majirani washtuke na walipofika kwenye eneo la tukio ghafla majambazi hao walitokomea kusiko julikana.

 

Alieleza zaidi kuwa inadaiwa majirani ndio waliomchukua sanga na kumpeleka kwenye Zahanati ya msindo ambako mganga wa zahanati hiyo aliwaambia kuwa sanga alikuwa tayari ameshafariki dunia.

 

Hata hivyo kaimu kamanda wa polisi malimi alisema kuwa juhudi za kuwasaka watuhumiwa zinaendelea na amewaomba raia wema waonyeshe ushirikiano kwa jeshi la polisi ili watuhumiwa hao waweze kukamatwa.

MWISHO